NAMPO Kaap 2026 vind van 9 tot 12 September op Bredasdorp Park in Bredasdorp plaas en bring produsente, landboubesighede, navorsers, diensverskaffers en gemeenskappe van oor die hele landbouwaardeketting bymekaar.
Aangebied met die tema “Saam groei ons”, vier vanjaar se ekspo die vennootskappe tussen produsente, die bedryf en gemeenskappe wat Suid-Afrikaanse landbou vorentoe dryf. Met 600 uitstalruimtes en parkering oor 32 ha sal besoekers toegang hê tot meer as 500 uitstallers wat die nuutste landboutegnologie, produkte, dienste en innovasies ten toon stel.
Landbou kan nie in isolasie floreer nie
Die 2026-tema weerspieël ’n eenvoudige maar belangrike werklikheid: Landbou kan nie in isolasie floreer nie. Die bou van ’n veerkragtige, mededingende en volhoubare sektor hang af van sterk vennootskappe tussen produsente, landboubesighede, georgani-
seerde landbou, navorsers, innoveerders, diensverskaffers, finansiers, die regering en die gemeenskappe wat die sektor ondersteun.
Dit is veral relevant vir produsente in die wintergraangebiede, waar druk op produktiwiteit, winsgewendheid en langtermynvertroue steeds toeneem. Hoë insetkoste, swakker kommoditeitspryse, finansieringskoste, beleidsonsekerheid en moeilike produksietoestande plaas produsente onder finansiële druk. Onlangse verwikkelinge rakende die koringtariefbedeling het kommer oor produsentevertroue, mededingendheid en die langtermynvolhoubaarheid van plaaslike koringproduksie verder verskerp.
Dr Dirk Strydom, besturende direkteur van Nampo (Pty) Ltd, sê NAMPO Kaap het juis ’n belangrike platform geword omdat dit ruimte skep waar produsente in moeilike tye rigting kan vind.
“Produsente in die wintergraangebiede boer in ’n omgewing waar elke besluit al hoe meer kompleks raak. Produktiwiteit, winsgewendheid, insetkoste, marktoegang en beleidsekerheid vorm almal deel van dieselfde gesprek. NAMPO Kaap bied aan produsente die geleentheid om uit isolasie te tree, met die breër waardeketting te skakel en praktiese antwoorde te soek wat hul ondernemings en vertroue vir die seisoene wat voorlê, kan versterk,” sê Strydom.
Hoewel individuele produsente hierdie uitdagings dikwels alleen dra, bied NAMPO Kaap ’n ruimte waar hulle kan kontak maak, idees kan vergelyk, nuwe tegnologieë kan verken en deel kan neem aan praktiese gesprekke wat tot werklike oplossings op plase kan lei. Die ekspo is nie net ’n vertoonvenster vir produkte en dienste nie, maar ook ’n ontmoetingsplek vir nuwe denke, samewerking en gesamentlike probleemoplossing.
Henk Aggenbach, voorsitter van Bredasdorp Park NPC, sê die tema is besonder relevant binne die huidige omgewing waarin landbouprodusente in Suid-Afrika hulself bevind. “Regoor die sektor werk baie ondernemings harder vir kleiner marges. Produksiekoste bly hoog, terwyl swakker kommoditeitspryse steeds druk op produsente plaas,” sê hy.
Lewendehaweprodusente hanteer ook steeds die impak van bek-en-klouseer, wat finansiële druk verhoog, veebeweging ontwrig en toegang tot uitvoermarkte beïnvloed het. Daarbenewens het erge oorstromings in Mei 2026 wydverspreide infrastruktuur-
skade in die Wes-Kaap veroorsaak. Hierdie werklikhede beklemtoon hoe blootgestel produsente is – nie net aan markdruk nie, maar ook aan dieregesondheidsrisiko’s, infrastruktuurswakhede en uiterste weersomstandighede.
Teen hierdie agtergrond is “Saam groei ons” meer as net ’n tema; dit is ’n praktiese verklaring van hoe die landbousektor vorentoe beweeg. NAMPO Kaap skep ’n belangrike platform waar produsente oplossings kan vind, nuwe idees kan ontgin en toegang tot innovasie naby aan die plaas kan kry. Dit bied ook ’n geleentheid vir gesprekke wat saak maak – tussen produsente, insetverskaffers, kommoditeits-
organisasies, navorsers, finansiers en beleidmakers.
Volgens Strydom lê die waarde van NAMPO Kaap daarin dat dit kennis, tegnologie en mense op een plek bymekaar bring.
“Geen enkele produsent kan vandag se produksie- en winsgewendheidsuitdagings alleen oplos nie. Wat NAMPO Kaap doen is om die regte mense in dieselfde ruimte te bring – produsente, verskaffers, navorsers, georganiseerde landbou en diensverskaffers – sodat gesprekke idees kan word, idees besluite kan word en besluite praktiese verandering op plase kan word. Daarom maak hierdie platform saak, veral in ’n streek waar produsente onder werklike druk verkeer,” sê Strydom.
Vanjaar sal georganiseerde landbousessies in die Santam-ouditorium verteenwoor-
digers van die Rooivleisprodusente-organisasie, Melkprodusente-organisasie, Vinpro en Graan SA bymekaar bring om sektorprioriteite, uitdagings en oplossings te bespreek. Besoekers sal ook insigte en innovasie kan verken deur die gewilde Nasie in Gesprek, Food for Mzansi-gesprekke, die Ikusasa Water Wise Centre en ’n seminaar oor beskermde groenteproduksie.
Ruiterprogram om besoekers te vermaak
Die ruiterprogram in die Western Cape Lubricants-arena sal gewilde hoogtepunte insluit, waaronder die Suid-Afrikaanse Lipizzaners, bekend vir hul gechoreografeerde vertonings en presisierykuns. Besoekers kan ook uitsien na demonstrasies van berede boogskiet deur Griffins Horse Archery, waar ruiters spoed, vaardigheid en akkuraatheid ten toon stel terwyl hulle te perd na teikens skiet.
Mounted Games, dikwels beskryf as die tienkamp van ruitersport, sal verdere opwinding aan die program verleen. Die dissipline kombineer spoed, ratsheid en presisie terwyl ruiters skerp draaie, vinnige oorgee-aksies en ingewikkelde hindernisse met uitsonderlike beheer navigeer.
Werkende honde en rasskoue
Namate tegnologie al hoe meer in landbou geïntegreer word, bly werkende honde hul waarde op plase en in gespesialiseerde dienste bewys. Besoekers sal kan sien hoe goed opgeleide skaaphonde met doeltreffende, laestresveehantering help, terwyl die Suid-Afrikaanse Lugmag se honde hul dissipline, ratsheid en vaardigheid sal ten toon stel. Die ekspo sal ook die kenmerkende Suid-Afrikaanse boerboel in ’n toegewyde rasvertoning vier.
Diere in die kollig
Groot nuus is dat daar wel lewende beeste, skape en bokke by die Landbank-veetent te siene sal wees. Telersgenootskappe sal op hul pos wees om hul kundigheid met besoekers te deel. Die 2026-geleentheid sal ’n uitgebreide pluimvee-uitstalling insluit, met ’n verskeidenheid rasse wat aan die pluimveeskou deelneem.
Vroueprogram bied inspirasie en vermaak
Die vrouetent word vanjaar uitgebrei om nog meer besoekers te verwelkom. Die program bied ’n groot verskeidenheid: inspirasie, uitstekende kos, musiek en boeiende gesprekke, met optredes en bydraes deur gewilde kunstenaars en persoonlikhede, insluitend Mel die Storieverteller, Brendan Peyper, Franna Benadé en Willem Botha.
NAMPO Kaap se tema vanjaar weerspieël sowel die werklikhede van die huidige oomblik as die gees wat vir die toekoms nodig is: Veerkragtigheid word gesamentlik gebou, en volhoubare landbouvooruitgang hang af van ’n bedryf wat kennis, geleenthede en oplossings deel.
Besoekersinligting
Kaartjies vir NAMPO Kaap 2026 is vanaf 1 Julie aanlyn beskikbaar deur die bestaande kaartjieplatform. Kaartjies is nie dagspesifiek nie en kan op enige van die vier dae gebruik word.
Kaartjiepryse:
- R110 per volwassene aanlyn
- R120 per volwassene by die hek
- R60 per kind by die hek alleenlik
- Gratis toegang vir voorskoolse kinders
Ekspo-ure:
- 9 tot 11 September: 08:00 tot 17:00
- 12 September: 08:00 tot 14:00
Verblyfinligting:
- Kaap Agulhas-toerismekantoor: 028 425 5500/082 896 2225
- overberg-info.co.za
- Tentverblyf by Bredasdorp Park: admin@antoinetteevents.co.za
