Belegging in jong landbouleiers se groei

Alhoewel die Suid-Afrikaanse landbousektor hoogs ontwikkel is, moet die bedryf talle uitdagings trotseer, onder meer ekonomiese druk, uiterste klimaat- en omgewingstoestande asook politieke onsekerheid.

Die kernrede vir landbou is om genoeg voedsel te produseer om voedselsekuriteit te verseker in ’n Suid-Afrika waar hongersnood plek-plek begin kop uitsteek. Dit is egter nie so eenvoudig nie. Syngenta se leuse is “Bringing plant potential to life”. Op dieselfde trant glo ons dat Syngenta ’n bydrae kan lewer om potensiaal in die vorm van leierskapvaardighede binne die landbousektor te ontwikkel.

Met die visie om deel te wees van die vorming van landbou, is Syngenta trots om jong produsente en rolspelers as leiers op die plaas en in die landboubedryf op te lei om die uitdagings te verstaan, meer geleenthede te skep en nuwe idees te implementeer.

Vanaf die Grain Academy (2013 – 2019) na die Leadership Academy for Agriculture (2020)
Teen hierdie agtergrond het die Grain Academy die lig gesien – ’n pasgemaakte program, ontwikkel vir jong, kommersiële produsente wat die argitekte van môre se landbou-arena is. Na sewe suksesvolle jare en die kaliber mense wat opgelei is, het Syngenta en Graan SA besluit om die program na alle landboubedrywe uit te brei om sodoende ’n groter impak in die landbousektor te verseker. Voorheen was die akademie toegespits op graanprodusente, maar nou sal meer kandidate die program, wat onder meer fokus op leierskapopleiding, verhoudingbestuur, kommunikasie en strategie-ontwikkeling, kan deurloop.