Algehele wenners 2021

Wenner
Met hierdie foto getiteld “Golwe in die graanbedryf” wen Pieter Burger van Malmesbury 2021 se Graan SA/Corporate Guarantee-fotokompetisie en ’n kontantprys van R15 000. Sy foto was die wenner in Januarie 2021 se kompetisie.

Tweede
Benro Botha is die naaswenner met hierdie foto wat op die plaas Rhebokkop tussen Harrismith en Verkykerskop geneem is. Die foto is inNovember 2021 aangewys as die wenfoto van die maand. Vir sy tweede plek in die algehele kompetisie steek Benro R10 000 in sy sak.

Derde
Siobhan Smith van Wepener beskou hierdie foto as ’n samestelling van haar man se karakter: hardwerkend, passievol, doelgerig en deernisvol. Dié Augustus 2021-wenfoto besorg aan haar die algehele derde plek en ’n kontantprys van R5 000.

Beste foto’s in 2021 – hier is die wenners

Amateurfotograwe het weer in 2021 die geleentheid gehad om deel te neem aan die Graan SA/Corporate Guarantee-fotokompetisie. Die tema – ’n dag in die lewe van ’n graanprodusent – het geleentheid gebied vir die neem van uitsonderlike foto’s. SA Graan/Grain wys maandeliks ’n wenner, tweede en derde plek aan, waarna die topdriefoto’s van die jaar gekies word.

Die beoordelaars het behoorlik kopgekrap oor 2021 se drie beste foto’s en uiteindelik Pieter Burger se foto getiteld “Golwe in die graanbedryf” as wenner aangewys. Dié wenfoto besorg aan Pieter ’n kontantprys van R15 000 danksy ’n borgskap van Corporate Guarantee. Benro Botha het die tweede plek behaal en wen daarmee R10 000. Die derde plek gaan aan Siobhan Smith met ’n pragtige foto van ’n dag in die lewe van haar man, ’n graanprodusent van Wepener. Hiermee wen sy R5 000.

Einde van ’n era
Ons land se graanprodusente is nie net topklaslandbouers nie, maar ook veelsydige en talentvolle mense wat naby aan die natuur leef. Wie dan beter om uit te daag om eg Suid-Afrikaanse landbouverwante foto’s te neem wat die essensie van die graanbedryf, die plaaslewe en mense in landbou kan vasvang?

“Toe die kompetisie in 2008 geloods is, was die belangstelling uit die staanspoor – veral wat produsente en hul gesinne betref – opwindend. Die inskrywings wat die kompetisie jaarliks gelok het, het nooit werklik afgeneem nie; soveel so dat dit uiteindelik een van die langslopende fotokompetisies aangebied deur ’n plaaslike landboutydskrif geraak het,” vertel Johan Smit, besturende redakteur van SA Graan/Grain.

“Ná veertien jaar (en sowat 3 000 foto-inskrywings later) het die tyd aangebreek om die kompetisie met die Desember/Januarie-uitgawe op ’n hoogtepunt af te sluit. Dit was ’n voorreg om aan menige amateurfotograaf die geleentheid te bied om hul kameravernuf en kreatiwiteit op dié manier ten toon te stel. Die kompetisie maak nou plek vir nuwe en opwindende tydskrifinhoud-idees wat beplan word. Die kans is egter goed dat SA Graan/Grain steeds die A-raamtent­kalender jaarliks sal uitbring.”

Borge en beoordelaarspan
Met borge soos Sasol (2008 – 2020) en Corporate Guarantee (2021) kon die maandwenners en ook algehele jaarwenners met stewige kontantpryse wegstap. Die topdriefoto’s is maandeliks in die tydskrif en op sagrainmag.co.za gepubliseer. Voor die COVID-jare is die jaarwenners tydens ’n luisterryke bekroningsfunksie of by die NAMPO Oesdag bekendgemaak en die pryse aan hulle oorhandig.

“’n Spesiale woord van dank aan prof Attie Gerber (tot en met sy aftrede verbonde aan die NWU se filmskool) wat sedert 2008 onafgebroke betrokke was deur elke maand die foto’s te help beoordeel. So ook aan Helenus Kruger, ’n professionele fotograaf van Pretoria, wat sedert 2014 sy kennis inge­span het as beoordelaar én aan die redakteur van SA Graan/Grain, Valerie Cilliers, wat die driemanskap van beoordelaars voltooi het.


“Dankie ook aan die redaksiesekretaresse, Elmien Bosch, wat die administrasie van die kompetisie noukeurig bestuur het. Louise Kunz, ’n gereelde medewerker, se maandelikse fotoneemwenke het deurentyd waarde toegevoeg,” het Johan gesê.

Vir die span by SA Graan/Grain was dit elke maand ’n groot hoogtepunt om die foto’s te ontvang. Ons gaan beslis die interaksie met fotograwe en beoordelaars mis, maar ons sien uit na nuwe projekte wat vorentoe in die tydskrif gaan verskyn.

- Advertisement -

 

Copy link
Powered by Social Snap