Graan SA se Raadsfunksie word jaarliks in Junie/Julie tydens die organisasie se Raadsvergadering, wat oor twee dae strek, aangebied. Dit is ’n aand van deernis en erkenning, het Nico Vermaak, maatskappysekretaris van Graan SA, gesê toe hy die gaste verwelkom by vanjaar se geleentheid wat op 10 Julie op NAMPO Park plaasgevind het.
Die funksie bied die geleentheid om afskeid te neem van Graan SA-lede wat voorheen in die organisasie se Raad gedien het. Graan SA-personeel ontvang ook langdienstoekennings tydens hierdie geleentheid.
Dr Tobias Doyer, HUB van Graan SA, het raadslede en hul gades, personeel en gaste bedank dat hulle deel van die Graan SA-familie is. “Ons weet watter geweldige opoffering dit is vir produsente om hierdie organisasie aan die gang te hou. Ons is ook dankbaar vir elke Raadslid se gesin wat familietyd prysgee sodat hierdie landbouleiers Suid-Afrikaanse graanprodusente kan verteenwoordig.
“Ek besef ons het elkeen maar ’n kort tydjie om ’n verskil te maak. Soos die katedrale in Europa wat oor dekades gebou is en elke messelaar in sy gegewe tydperk lagie vir lagie stene kon lê, so ook het Raadslede die geleentheid om aan Graan SA te bou. Hierdie is ons kans om baksteen en sement neer te sit en die organisasie verder op te bou tot voordeel van graanprodusente,” het hy bygevoeg.
Graan SA se bestuurspan gee jaarliks erkenning aan ’n Raadslid vir uitnemendheid en toewyding en dié trofee het Jose de Kock, Raadslid vir Streek 27, vanjaar te beurt geval. Sy liefde en passie vir die bedryf asook die uitnemende manier waarop hy leiding neem het vir die span uitgestaan. Hy is ook die voorsitter van die Nasionale Garsbedryfskomitee.
Die Raadsfunksie is moontlik gemaak deur Bayer. “Dit is die tiende jaar dat Bayer deel is van hierdie besonderse byeenkoms en ons sien ons betrokkenheid as ’n geleentheid om landbouers te ondersteun. Dankie dat julle as boere namens ander boere optree. Dit is ons hoop dat Graan SA en Bayer se gesamentlike passie vir landbou hierdie verhouding net sterker sal maak,” het Johan Bibbey, hoof van Bayer se saaddivisie in SA, gesê.
