Hierdie nuwe kompetisie bied aan SA Graan/Grain-lesers die geleentheid om hulle kreatiwiteit in die kombuis ten toon te stel en boonop #Lekkerrr pryse te wen! Ons is op soek na oorspronklike en/of innoverende graan- of oliesaadgebaseerde resepte wat sorg vir spontane komplimente van jou gesin, familie of gaste.

Wat behels die kompetisie?

1. Die resep moet uniek wees. Dit kan óf ’n oorspronklike resep wees, óf ’n bekende resep wat in so ’n mate aangepas is dat daar iets verrasssend aan is.
2. Die resep se hoofbestanddeel – of ten minste ’n vername bestanddeel daarvan – moet een van die grane of oliesade (verwerk of onverwerk) wees wat Graan SA as produsente-organisasie verteenwoordig, naamlik:
   • Mielies
   • Koring
   • Gars
   • Sonneblom
   • Sojabone
   • Sorghum
   • Kanola
   • Grondbone

3. Om in te skryf, moet die vorm op sagrainmag.co.za volledig voltooi word.
4. ’n Naam of beskrywing van die resep se eindproduk moet verskaf word.
5. Alle bestanddele en hoeveelhede of mates moet aangedui word, asook die aantal persone waarvoor die resep geskik is.
6. Die metode moet stap-vir-stap uiteengesit word.
7. ’n Nabyfoto van die eindproduk (’n selfoonfoto teen die hoogste moontlike resolusie behoort voldoende te wees) moet aangeheg word.
8. Inskrywings is beperk tot een inskrywing per persoon per maand.
9. Die inskrywing moet ons bereik voor of op die laaste dag van ’n maand, d.w.s. die Februarie-uitgawe se inskrywings sluit teen 28 Februarie. Enige inskrywing ontvang ná die laaste dag van ’n maand, kwalifiseer vir die volgende maand se inskrywings.
10. ’n Maandwenner van die huidige kompetisie (Februarie- tot Desember/Januarie-uitgawes van SA Graan/Grain) mag nie weer in dieselfde tydperk deelneem nie.
11. Inskrywings wat nie gewen het nie, kan in ’n volgende maand weer vir die kompetisie in aanmerking kom.
12. Die kompetisie is oop vir alle ouderdomme, maar ’n ouer/voog moet toestemming gee wanneer die deelnemer onder 18 is.
13. ’n Maandwenner sal ’n John Deere-gemerkte geskenk ontvang en in aanmerking kom vir die R5 000-kontantprys wat aan die einde van die jaar aan die algehele wenner toegeken sal word.
14. Beoordeling sal deur ’n paneel beoordelaars plaasvind wat deur SA Graan/Grain aangewys word. Die beoordelaars se beslissing is finaal.
15. Wenners sal persoonlik deur SA Graan/Grain gekontak word en op die webwerf (sagrainmag.co.za) asook in SA Graan/Grain aangekondig word.
16. Die deelnemer stem in dat sy/haar identiteit gekoppel kan word aan die ingeskrewe resep en/of die kompetisie by wyse van gedrukte of aanlyn publisering.
17. Deur vir die kompetisie in te skryf, verleen die deelnemer sy/haar toestemming dat die resep deur die organiseerders gebruik en gepubliseer kan word, met erkenning aan die inskrywer.
18. Werknemers van die Graan SA-groep, John Deere Afrika en Midde-Ooste asook die redaksiespan van SA Graan/Grain word nie toegelaat om deel te neem nie.